O próximo 12 de xullo remata o prazo para solicitar as bolsas do programa Re-Acciona
ECONOMÍA E INDUSTRIA PON AO DISPOR DE 200 NOVOS TITULADOS A OPORTUNIDADE DE FORMARSE COMO ESPECIALISTAS NA MELLORA COMPETITIVA DAS PEMES
Os 100 titulados seleccionados tamén poderán prestar servizos en ata catro pemes diferentes, titorizados por expertos
O Programa Re-Acciona conta cunha dotación global de 5 millóns de euros para facer máis de 2.200 diagnoses de competitividade e internacionalización nas pemes galegas e prestar servizos avanzados para aplicar melloras competitivas concretas nas empresas
Santiago, 3 de xullo de 2012.- A Consellería de Economía e Industria pon ao dispor de 200 novos titulados a oportunidade de formarse como especialistas na mellora competitiva das pemes co Plan Re-Acciona. O próximo 12 de xullo remata o prazo de presentación de solicitudes do programa de formación e emprego asociado ao Programa Re-Acciona.
Mediante este programa, a Consellería de Economía e Industria seleccionará e formará a 200 novos titulados, e facilitará a 100 deles a oportunidade de participar nos seus programas de mellora da competitividade, colaborando na implantación de servizos avanzados nas Pemes que os demanden.
O Programa Re-Acciona conta cun orzamento total de 5 millóns de euros para 2 anos. Con este programa, o Igape realizará máis de 2.200 diagnósticos gratuítos de internacionalización e de competitividade; tamén levará a cabo servizos avanzados de alto valor engadido, a custo moi reducido para as empresas, co obxectivo de facilitar a profesionalización e a mellora na xestión, e ademais desenvolver este programa formativo.
Os 100 titulados seleccionados colaborarán na prestación de servizos avanzados nas pemes que se acollan ao Programa re-Acciona; así, os bolseiros poderán chegar a participar en ata catro empresas diferentes, ademais de contar con outro período de formación máis específico durante o período de prácticas. Os seleccionados disporán dun ano de prácticas en empresas, prorrogable por catro meses máis, contando coa supervisión e titorización das empresas especializadas que colaboran co Igape na prestación de servizos de asesoramento ás pemes.
Requisitos
Segundo as bases publicadas no DOG o 12 de xuño, os bolseiros deberán ser titulados –entre os anos 2006 e 2012– en física, matemáticas, química, enxeñería, ciencias económicas e empresariais, administración e dirección de empresas, ciencias empresariais, economía ou dereito. A selección estará baseada no currículo dos solicitantes.
No seu conxunto, o proceso permitirá que os bolseiros accedan a novas competencias profesionais en ámbitos onde a experiencia práctica e fundamental para o desenvolvemento de proxectos, incrementando as súas posibilidades de atopar un emprego de calidade.
Esta iniciativa de formación, especialización e promoción do emprego da Consellería de Economía e Industria está deseñado para reforzar, ao abeiro do re-Acciona, a estratexia dun Igape próximo que achega solucións eficientes ás necesidades reais das pemes e responde á súa reorientación como un Instituto centrado na prestación de servizos avanzados.