MENOS DEREITOS PARA A MAIORÍA
NON PODEMOS CONSENTILO
SOMOS MÁIS
CONCENTRACIÓN VENRES DIA 10 DE AGOSTO
Lugar: DELEGACIÓN DE FACENDA (FOZ)
Hora: 12:00
CCOO, CIG e UGT convocan unha concentración diante da delegación de Facenda en Foz, contra o saqueo para impedir que nos arruínen
Os recortes aprobados o 13 de xullo polo Goberno de Mariano Rajoy supoñen unha perda de dereitos sen precedentes na historia da democracia e van facer aínda máis precarias as condicións de vida e traballo de case dous millóns de galegos e galegas:
Provocan un agravamento da recesión e o peche de moitas empresas, a destrución de máis de 80.000 empregos en Galicia nos próximos dous anos e o aumento da taxa de paro ata o 26%.
Diminúen entre o 5% e o 7% o salario dos 200.000 empregados e empregadas públicos galegos, agravando a perda do 12% do salario real que acumulan desde 2010. O aumento da xornada, a eliminación de dereitos e os cambios organizativos ameazan o futuro do persoal interino dos servizos públicos e deteriora a calidade do servizo.
Reducen a protección aos 270.000 parados e paradas galegos e, especialmente, aos 147.000 que cobran prestacións tanto na contía como no acceso a elas.
Agravan a situación das 150.000 persoas dependentes que hai en Galicia e das súas familias ao recortar os dereitos na atención á dependencia e poñer en perigo o conxunto do sistema.
As 820.000 persoas traballadoras e as 731.000 pensionistas galegas perden poder adquisitivo polo aumento da inflación derivado da suba do IVE.
Por riba, reducen dous puntos as cotizacións empresariais á seguridade social para, ademais de beneficiar as empresas, xustificar no futuro un novo recorte nas pensións.
HAI QUE PARALOS MOBILÍZATE