Antonio Veiga explicou que “este tipo de probas deportivas, ademais de incentivar un hábito saudable, serven para fomentar as relacións sociais entre os máis pequenos e as súas familias”
As augas do Golfo do Masma acollerán esta regata os días 8 e 9 de setembro baixo o nome “Trofeo Virxe do Carme”
Foz, 5 de setembro de 2012. A vila de Foz acollerá, esta fin de semana, a regata clasificatoria para o Campionato Galego da clase Optimist de Vela “Trofeo Virxe do Carme”. Así o anunciou o vicepresidente da Deputación de Lugo e responsábel das áreas de Benestar Social e Deporte, o nacionalista Antonio Veiga. O Club Náutico de Foz e a Federación Galega de Vela, en colaboración coa Vicepresidencia da institución provincial, son os encargados de organizar esta proba que está dirixida a rapaces e rapazas de entre 10 e 15 anos de idade, procedentes de toda Galiza.
Durante a súa intervención, Antonio Veiga explicou que “dende a área de Deporte da Deputación de Lugo apostamos polo deporte de base, e esta regata é un bo exemplo diso, xa que ademais de incentivar un hábito saudable, serve para promover as relacións sociais entre os máis pequenos e as súas familias”.
Esta regata clasificatoria do Campionato Galego da clase Optimist, na que está previsto que participen arredor de 100 embarcacións, entre as que estará presente o Club Náutio de Foz, disputarase en augas do Golfo do Masma os días 8 e 9 de setembro, en horario de mañá. Destas probas clasificatorias sairán os 10 mellores nenos e nenas que comporán o equipo galego de Optimist para as competicións que se celebren fóra de Galiza.
O formato da competición será unha navegación en flota cun percorrido sobre un trapecio, calculándose a distancia total de maneira que cada proba dure entre 30 e 40 minutos, aproximadamente. Hai programadas seis probas, das cales deberá completarse como mínimo unha para que a regata sexa válida.
Unha vez finalicen as probas, o domingo, a partir das 17.00 horas, procederase á entrega de premios, con trofeos para os tres primeiros clasificados da categoría xeral, así coma os tres primeiros das categorías B e C.