Espazo Ecosocialista alerta sobre cortes sociais e denuncia a obcecación polas infraestruturas
Compostela, 2 de outubro de 2.012.- O anteproxecto de orzamentos 2013 presentados pola administración Central o pasado 27 de setembro son para Espazo Ecosocialista un claro exemplo duns orzamentos feitos á medida do entramado financieiro neoliberal, nos que a meirande parte da poboación soportará os custos dunha débeda que non xeraron, directamente na asignación dunha enorme cantidade de cartos para o pago directo dos intereses desa débeda e coa contrapartida da redución drástica das partidas orzamentarias adicadas ao ben común.
Así vemos unha redución do 21% nos gastos adicados a educación, 22% en sanidade, 14 % en agricultura e medio ambiente, a axuda á cooperación leva acumulada un descenso do 73%, os fondos para o desemprego descenden un 6,3% a pesares do aumento exponencial das cifras de desempregados, non hai partida orzamentaria prevista para continuar coa axuda de 400 € para familias sen ingresos, 3,8% menos de cartos para becas, …
Sorprende que as partidas con menor recorte sexan as adicadas á Casa Real (4%), ás Cortes (2,5%), o Consello Social ((2%), Seguridade Cidadá do Ministerio de Interior (4,8%) e Defensa (6,8%) e semella unha falta de respecto á cidadanía a subida no orzamento do Ministerio da Presidencia (0,6%).
O estado español vai empregar unha cuarta parte do seu orzamento no pago de intereses da débeda, débeda provocada e da que se benefician prácticas financeiras especulativas pero que ilexítimamente ten que pagar o conxunto da cidadanía, noutro exemplo máis de privatización dos beneficios e socialización das perdas. O enorme volume de cartos para este pago extraese das partidas adicadas ao ben común, fornecendo aos fondos de investimento, hedge funds e demais entidades especulativas de máis “munición” para continuar as políticas de demolición do estado do benestar, dos dereitos dos traballadores e traballadoras e da saúde ambiental do noso planeta.
Os Ecosocialistas queremos chamar a atención tamén sobre a obsesión polas infraestruturas de transporte que contemplan reiteradamente os distintos orzamentos. Nun momento de menor dispoñibilidade de fondos, cumpre apostar por investimentos do máximo valor social e ambiental, que contribúan a desenvolver o camiño do cambio de paradigma a nivel enerxético, laboral e económico cara a sustentabilidade. Non é o caso nin no Estado nin en Galicia. Así vemos que as partidas da Consellería de Medio Ambiente, Infraestruturas e Transportes van adicadas na súa práctica totalidade a autovías e ao AVE. Contémplanse investimentos para a autovía de acceso a Coruña, para a A-54 Lugo Santiago, a A-8, para o AVE a Madrid, etc.. na contraparte, por poñer uns exemplos, non hai partidas para o saneamento de Ría do Burgo ou de Ferrol, a depuradora de Santiago terá que agardar algúns anos máis e seguiremos sen ter unha liña de ferrocarril entre Lugo e Santiago nin tampouco un verdadeiro servizo de proximidade ferroviaria.
En definitiva, os orzamentos son unha das ferramentas máis potentes para orientar o desenvolvemento dunha sociedade e definir cara onde quere ir. Este anteproxecto de orzamentos reitera o ataque aos servizos públicos, aposta pola precarización das vidas da meirande parte da cidadanía, cada vez con maiores atrancos para acceder á saúde, á educación, á cultura e mesmo á alimentación. Uns orzamentos que continúan na carreira desenfreada cara a destrución ambiental e ao cambio climático. Uns orzamentos que insisten en sangrar economicamente á xente do común para beneficio dunhas elites financeiras causantes directas da crise e da que ainda non coñecemos unha persoa que fora convicta por este monumental fraude e estafa que denominamos “crise”.
Espazo Ecosocialistas defende uns orzamentos que marquen o camiño a sustentabilidade, no que o sector público entendido como garante do ben común teña unha presencia preponderante; onde as políticas de desenvolvemento apoien aquelas iniciativas con forte potencial de emprego, de I+D+I, que sexan beneficiosas social e ambientalmente e que permitan ir ascendendo chanzos na imprescindible mudanza de paradigma económico e enerxético como son o sector das enerxías renovábeis, o transporte público, a pesca artesanal, a agricultura e gandería ecolóxica, entre outros moitos. Uns orzamentos redistributivos, apoiados por políticas fiscais xustas e equitativas onde potenciemos o beneficioso para o ben común e penalicemos o lesivo. Uns orzamentos que real e definitivamente nos sitúen na senda dunha sociedade máis solidaria, desenvolvida, xusta e integrada nun mundo globalizado na xustiza e na equidade, no canto da inxustiza e a explotación.