FAGAMOS FUTUROLOXIA
Ano 2030. Escolas segregadas para ricos e para pobres, para nenos e nenas, para legais e ilegais, para listos e para bobos, imparten contidos minimizados acordes coa situación socioeconómica. As bolsas e axudas suprimíronse porque desestabilizan a partida 12558-D, que segundo os expertos, só pode supor o 0,000000004 % do PIB. Nos comedores escolares públicos semibaleiros algúns nenos abren os seus fiambreiras traídas de casa, mentres outros miran como comen.
Ano 2030 na Mariña. Cada paciente achega no momento do seu ingreso no hospital de Burela de xestión privada un xogo de sabas xunto con 400 euros. As listas de espera e os desesperados amontóanse inseparables en corredores e antesalas. As mulleres sen recursos desangranse ao abortar ilegalmente nas súas casas. E ás portas dos ambulatorios inmigrantes sen papeis mendigan medicamentos e atención humanitaria. Algúns sen pernas ou brazos demandan próteses e cadeiras de rodas pousados sobre artefactos caseiros feitos de táboas con rodas, como os de outrora. Aínda abonando a póliza sanitaria de Ana Mato non teñen dereito a soñar con camiñar.
Ano 2030. O Partido da Dereita, que non dos dereitos, volveu gañar as eleccións con maioría absoluta. exerceron tan protocolario dereito dez dos censados, seis votaron ao PP. A comisión electoral valida a legalidade dos procedementos. A maioría da poboación de A Mariña permanece na casa e segue os acontecementos por televisión. O presidente de turno da dereita oculta a porra á cámara mentres defende o abstencionismo como idiosincrásico de cidadáns traballadores, pouco amantes de algaradas rueiras. A Sáenz de Santamaría de turno anuncia novas medidas infernais, despedimentos masivos, sacrificios, poutadas e modulacions, fundamentais para crecer e xerar emprego. A culpa de todo tena un maldito Zapatero, coinciden o presidente e a súa escudeira.
Otero Regal