O documental sobre Barriga Verde chega á Pontenova a Casa da Cultura

A presentación terá lugar na Casa da Cultura da Pontenova ás 19h do 14 de Outubro.
O documental foi rodado nunha vintena de localizacións de Galicia e Europa, durante máis de dous anos.

O documental Morreu o demo, acabouse a peseta, que explora as raíces europeas do títere de luva que percorreu Galiza entre 1910 e 1960, será presentado o vindeiro domingo 14 na Casa da Cultura da Pontenova. Precisamente, as festas desta vila foron cita obrigada durante moitos anos a barraca da familia Silvent, creadora de Barriga Verde, que acodía ás Feiras de Outubro tras o seu paso polo San Froilán.

A longametraxe documental, dirixida por Pedro Solla, autor tamén do guión xunto con Marcelo Martínez, está producida por Tintimán Audiovisual e conta co apoio da AGADIC e da TVG. A Deputación de Lugo, que organiza esta proxección, colaborou tamén co filme facilitando que a nova barraca de Barriga Verde, reconstruída pola compañía de títeres Viravolta, actuase nas festas das San Lucas e do San Froilán en 2010. Comba Campoy, produtora executiva do documental, presentará o filme xunto coa concelleria de turismo, Ángeles Villapol.

O documental trata de restaurar a memoria da familia Silvent a partir de conversas cos únicos descendentes dos titiriteiros, e da reconstrucción do espectáculo realizado pola compañía lalinense Viravolta. Paralelamente, o filme lévanos nunha viaxe internacional na busca das raíces comúns do teatro popular de marionetas europeo. Deste xeito, a rodaxe, iniciada en maio de 2009 en Londres, levou ao equipo de Tintimán Audiovsiual por Francia, Italia, Nápoles, República Checa e Portugal, así como aos festivais de títeres de Segovia ou de Redondela.