O G.M. do PP DENUNCIA QUE OS ERROS DERIVADOS DO MAL FUNCIONAMENTO DOS SERVICIOS DO CONCELLO ESTAN A SER PAGADOS POLOS VECIÑOS.
Dende o G.M. do PP vimos a denunciar o prexuízo que se esta a causar dende o Concello a aqueles dos nosos veciños/as que mensualmente reciben o SERVIZO DE AXUDA NO FOGAR, e que, como consecuencia do deficiente funcionamento dos servizos municipais, nos meses de outubro e novembro vense obrigados a aboar o pago conxunto de dúas mensualidades en vez da mensualidade corrente.
Nestes días os veciños/as beneficiarios deste servizo publico municipal de axuda no fogar están a percibir unha comunicación na que, dende a Concellería de Servizos Sociais se lles informa de que por mor a “causas alleas aos servizos municipais, desde o mes de agosto non se están a pasar os recibos do servizo de axuda no fogar, de aí que nos meses de outubro se lles cobre as mensualidades de xullo e agosto, en tanto que en novembro se lles cobrará as de setembro e outubro. Pois ben, dende o G.M. do PP entendemos que invocar “causas alleas aos servizos municipais”, en todo caso descoñecidas e ocultas, non é máis que un intento do Concelleiro responsable deste departamento por escorrentar o vulto e liberarse de responsabilidades, o que por outro lado xa é costume deste Goberno Municipal; agora ben, cumpre recordarlles que non hai causas alleas ao Goberno municipal, xa que todo o que acontece no Concello en relación a prestación dos servizos municipais é responsabilidade deles, os cales son sempre responsables, xa directamente, polas súas accións e actuacións, xa indirectamente polas súas omisións e neglixencias, de toda a actuación municipal; reiteramos que, de principio non hai nin existen causas alleas aos servizos municipais nin ao equipo de goberno que lles permitan xustificar o incorrecto funcionamento dos servizos públicos, e para o hipotético suposto de que puidera habelas, esas causas terían que terse solucionado no seu momento e os veciños/as deberían ter sido informados oportunamente das mesmas, e non se debería ter esperado dende o Concello máis de catro meses para intentar solucionar, unilateralmente e sen explicación algunha, o que non deixa de ser unha deficiente prestación do servizo municipal.
En todo caso e habida conta que o prexuízo para os cidadáns dende o Concello xa esta causado, o que hai que intentar é que este sexa o menor posible, de aí que dende o G.M. do PP lle pidamos ao equipo de Goberno que reconsidere esta actuación e a modifique no senso de facilitar aos veciños/as afectados a posibilidade de facer fronte ao abono destas mensualidades atrasadas en pagos fraccionados durante 6 ou 12 mensualidades, deste xeito as súas economías, na meirande parte dos casos XA moi debilitadas, no se verían obrigadas a soportar un esforzo económico tan grande nun espazo tan breve de tempo.
Dende o PP pedímoslle ao equipo de Goberno municipal que se adique máis a controlar a correcta prestación dos servizos municipais, que amosen unha maior dilixencia na xestión ao fronte do Concello e que en todo caso os erros, xa sexan derivados da actuación directa do Concello xa se deban a omisión dos deberes por parte do equipo de goberno, en ningún caso se traduzan nun prexuízo maior para os cidadáns.