Nunha xuntanza aberta á cidadanía e xunto coa militancia da formación, Víctor Álvarez Arias foi elixido novo coordinador comarcal de Lugo de Compromiso por Galicia, ocupando a función de Xosé Anxo Laxe, que a partir de agora asumirá a responsabilidade de política municipal e portavoz da formación a nivel local. Por outra banda, Rocío López Pacio, coordinadora territorial da formación será a mesma que ocupe a responsabilidade de organización da comarca de Lugo.
Tamén formarán parte do equipo da comarca Trinidad Fuenteseca ou Santiago Fernández Rocha, entre outros.
Os obxectivos marcados a curto e medio prazo son o asentamento dos piares fundamentais para dar a consolidación a nivel territorial da organización, a conformación nalgunhas localidades previstas na provincia e dar a coñecer as diferentes iniciativas a prol da transparencia pública.
Según López Pacio, “CxG ten que ser ferramenta que visibilice as demandas do colectivo e dun xeito totalmente transparente; xa que a cidadanía reclama respostas aos problemas do cotiá, polo que tamén é importante encontrar/crear novas formas de participación social para canalizar esas demandas”.
Iniciativa Lexislativa Popular
O líder de CxG cre que a corrupción en xeral, e nomeadamente a política, “é unha das cuestións que máis preocupan á cidadanía galega, e que contribúe á desafección e merma a calidade da nosa democracia”. A intención coa presentación desta proposición de lei de medidas de prevención da corrupción política é “recoller esa preocupación, e non pretende resolver, castigar ou sancionar, senón prever”, aclara Bascuas.
A iniciativa toma como referencia outras experiencias existentes noutras latitudes, como son o caso da ficha limpa da lexislación brasileira, os criterios marcados pola organización Transparencia Internacional e a propia proposta do Fiscal Superior de Galicia da creación do Consello de Prevención da Corrupción, figura existente na República portuguesa dende o ano 2008.
Ademais, Xoán Bascuas cre que estas medidas deben vir acompañadas da “exemplaridade na conduta nos representantes políticos galegos, e unha actuación pedagóxica orientada ao cambio dunha cultura política enormamente instalada no imaxinario colectivo”, así como do endurecemento do castigo a aqueles que non cumpren.