O evento ten para nós, con todo o respecto para os discrepantes, valores dignos a ter en conta: así consideramos o feito artístico-cultural dos magníficos carteis, faceta na que A Pomba é mestra, que estimula a mente e a imaxinación para descifrar a simboloxía das figuras que os ilustran; a posta en escena (vestimentas, música, declamación, cantigas…) baixo inspiración e realización do recoñecido showman Tono Neira e o elenco que o acompaña, tecendo unha hora de espectáculo que ten como soporte as vivencias de cada día, as preocupacións da veciñanza e os desexos dunha xestión pública mais participativa e mais eficaz nos campos sociais, culturais e de convivencia algúns dos cales os sinalan, dende o humor ou o enxeño, os artífices de O Touporroutou. Cabe preguntarse se os destinatarios das mensaxes serán receptivos, se terán a tolerancia e a intelixencia precisas para sacar partido e aproveitar as leccións que dende o acto lúdico se espallan. Escoitar e reflexionar é sempre bó, sexa quen queira o que nos fala… Todos; mesmo os que somos mais torpes, podemos ter unha idea lúcida.. ¡ E sería mágoa perdela! ¡Andamos tan escasos…!
Suso Fernández