San Cibrao rende culto ó ourizo cun completo programa da XXII Festa do Ourizo

A XXII Festa do Ourizo de San Cibrao, declarada de interese turístico nacional, arrincará o sábado 9 de marzo ás once e media da mañá coas XIII Xornadas Técnicas sobre o ourizo na carpa instalada na praza dos Campos.

Pilar Martínez López, autora do blog “La cocina de lechuza” ofrecerá unha conferencia baixo o nome “O ourizo: un bocado de mar na cociña”; mentres que os cociñeiros galegos con estrela Michelín, Pepe Solla e Pepe Vieira, prepararán receitas nas que o ourizo será o ingrediente principal durante o “Show Cooking” ou cociña en vivo. Os pratos poderán degustarse acompañados de viño Albariño.

Arredor das dúas da tarde clausuraranse as XIII Xornadas Técnicas e arrincará o XII Concurso Gastronómico do Ourizo na Casa da Cultura de San Cibrao onde os establecementos participantes na festa farán entrega dos pratos. Ás dúas e media desenvolverase a cata e deliberación por parte do xurado para facer entrega dos premios e distincións do concurso arredor das tres da tarde.

XXII Degustación Festa do Ourizo de San Cibrao
A degustación deste produto gastronómico poderase realizar durante toda a xornada do sábado 9 de marzo na carpa da Praza dos Campos ou nos establecementos participantes. A partir das seis da tarde, os locais do concurso tamén ofrecerán degustación de especialidades.

As charangas Manca na Cheda, de Mondoñedo; Charanga de Vilalba, e Aturuxo, de Ribadeo; ademais dos gaiteiros Airiños do Xunco, serán os encargados de poñer música a esta festa.