Foz, 18 de abril de 2013. A asociación de comerciantes, industriais e autónomos de Foz organiza a Feira de abril gastronómica, evento que se vai desenvolver mañá, venres, e tamén o sábado, en 16 establecementos de hostalería focenses.
Os locais participantes nesta iniciativa de Acia Foz ofrecerán aos seus clientes unha ampla variedade de pinchos, tapas, aperitivos e racións elaborados con produtos típicos da gastronomía andaluza a prezos populares, “peixe frito e rebozado, gambas ou xamón, entre outras suxerencias”, explican desde Acia Foz.
Esta cita terá lugar uns días antes da cea de conmemoración do 25 aniversario da creación da asociación de comerciantes, industriais e autónomos de Foz que terá lugar o vindeiro 25 de abril no Hotel Restaurante Leyton. Nesa xornada entregaranse os galardóns aos gañadores da ruta de tapas e ao día seguinte, o 26 de abril, sortearanse os premios entre aquelas persoas que fixeron a ruta dos viños.
Ademais o vindeiro luns, 22 de abril, presentarase a campaña As compras na túa vila teñen premio, que se desenvolverá desde esa xornada ata o 3 de maio. Está organizada pola Federación Galega de Comercio e a asociación de comerciantes, industriais e autónomos de Foz.