Os equipos “BadBoys” do IES Pontepedrina de Santiago de Compostela e “AF2ping” do IES A Pinguela de Monforte de Lemos gañaron os premios segundo e terceiro, respectivamente, da décimo primeira edición de RetoAlcoa, programa de formación empresarial en forma de competición promovido e patrocinado por Fundación Alcoa e organizado por Fundación Junior Achievement. O equipo “1550lois”, do colexio San Luis de Los Franceses de Madrid, obtivo o primeiro posto na final presencial entre os finalistas de distintas comunidades autónomas, que se celebrou en Madrid o 26 de abril.
Os compoñentes dos equipos, David Pérez Varela e Víctor Esteve Moreda (Badboys) e Lorena Casanova Guedes, Rubén Díaz Díaz e César Varcárcel Pérez (AF2PING), recolleron os galardóns de mans de José Ramón Camino de Miguel, presidente de Alcoa España, e acudiron acompañados dos seus profesores, Carlos Llanes Seoane e Enrique Sampil Sánchez, respectivamente.
En total, máis de 800 estudantes de entre 16 e 24 anos de institutos de ensinanza secundaria, bacharelato e formación profesional participaron na XI edición de RetoAlcoa; entre eles, máis de 300 rapaces e rapazas de centros galegos con 115 equipos.
O programa bateu récord de participación este curso, revalidando así a excelente acollida e valoración que vén obtendo ano tras ano, tanto por parte dos estudantes como de profesores e centros educativos, debido a que permite poñer en práctica os coñecementos adquiridos nas materias de matemáticas, administración de empresas e economía, coa tutela dos profesores e de maneira atractiva para os mozos e mozas, nun formato de competición por Internet.