Mariña, 26 de abril de 2013. Rosana Pérez, deputada do Bloque Nacionalista Galego (BNG), no Congreso dos Deputados, presentará, mañá sábado, ás 12:45 horas, na Cruz do Lobo, unha serie de iniciativas e preguntas dirixidas ao Goberno do Estado sobre o atraso que acumulan algúns dos tramos da A8 ao seu paso pola Mariña e nas que se demandan melloras nas estradas de titularidade estatal da comarca.
Desde o Bloque levan tempo alertando do mal estado de conservación e da falla de sinalización da A8, da N624 e da N634, o que supón un perigo para condutores e peóns. O Ministerio de Fomento é coñecedor de que a N634 é a estrada que máis puntos negros acumula de todo o Estado e continúa a non prestar atención a este asunto e a non buscarlle solucións.
Para os nacionalistas esta deixadez do Partido Popular enmárcase nunha estratexia máis ampla de illar a Mariña e sumila no atraso económico e social.
No acto participarán tamén cargos orgánicos e institucionais do Bloque Nacionalista Galego de Cervo, Burela, Foz, Barreiros, Ribadeo e Mondoñedo.