O terceiro campionato do Club Pádel Ribadeo contou con 114 xogadores e numerosa presenza de público

Ribadeo, 1 de abril de 2013. O terceiro campionato organizado polo Pádel Club Ribadeo, que concluiu o domingo 31 de marzo contou con numerosa presenza de público para ver os partidos das tres modalidades do torneo: masculina, feminina e mixta. Así o destacaron os organizadores do evento, quen comentaron que “participaron 114 xogadores, procedentes de diversos lugares de toda a provincia de Lugo e Asturias, o que demostra que os torneos do PCR se están convertendo nun referente no so comarcal, tamén a nivel provincial e autonómico neste deporte que está en auxe”.

En canto aos resultados na modalidade masculina, patrocinada por Servicios Gráficos Medias Tintas, a parella gañadora foi a formada por Gonzalo, de Navia, e Carlos, de Pontevedra. En segundo lugar clasificáronse Venancio Granda, de Barres, e Diego, de Barreiros. Os terceiros foron Pachi, de Viveiro, e Yan Luis, de Lugo.

No torneo mixto, patrocinado pola tenda Siete Pecados, gañou a parella formada por Jacobo Gradaílle e Tatiana, de Xove. No segundo posto clasificáronse Patxi e Rosa, de Viveiro; e o terceiro correspondeu a Nahir e Angelote, de Lugo.

E na modalidade feminina, tamén co patrocinio de Siete Pecados, os gañadores foron Eugenia, de Oviedo, e Ana Alonso, de Castropol. En segundo lugar clasificáronse Nahir, de Lugo, e Rosa, de Viveiro; e o terceiro posto foi para Tatiana e Raquel, de Viveiro.

Entre as tres modalidades repartíronse premios por un total de 1.300 euros en cheques regalo para gastar na tenda Siete Pecados, de Ribadeo.