Segundo explican desde a Concellería de Medio Ambiente, “a orixe desta iniciativa sitúase na provincia de Teruel; no ano 2005 un grupo de xeólogos aragoneses iniciaron a celebración dos Xeolodías, nos que se convocan a tódolos cidadáns que estean interesados en visitar unha zona de importancia xeolóxica”. E engaden que “con esta actividade Un paseo dende o Cámbrico ao Cuaternario, pretendese achegar á sociedade á xeoloxía a través dunha excursión de campo guiada polo xeólogo J. Francisco Canosa Martínez, visitando lugares interesantes polo seu ámbito xeolóxico e proporcionando unha información rigorosa a nivel divulgativo sensibilizando á poboación sobre a importancia e necesidade de protexer o noso patrimonio xeolóxico”.
A localidade elixida este ano na provincia de Lugo para realizar este acto foi Burela por tratarse dun punto de interese xeolóxico a nivel nacional e internacional, xa que nas súas inmediacións atópanse distintos elementos xeolóxicos pouco habituais ou cunhas características excepcionais, é o caso dos sucesos acontecidos entre o Cámbrico e o Cuaternario no noroeste da Península Ibérica. Desde a Delegación de Medio Ambiente sinala que “permite ver nestes lugares aspectos de cómo funciona a terra sobre a que vivimos e de qué recursos naturais dependemos. É tamén unha maneira de sensibilizar á poboación sobre a importancia e necesidade de protexer o noso patrimonio xeolóxico”.
Desde o Concello de Burela “agradecemos a celebración deste evento á Sociedade Xeolóxica de España e á Sociedade Galega de Historia Natural, así como a participación de todos os asistentes”.