A concelleira de Medio Ambiente, Patricia López Eijo, invita “a tódolos veciños/as a participar nesta mesa redonda e agradece de antemán a colaboración desinteresada dos ponentes da mesma: a doutora en Historia, Herminia Pernas Oroza, que introducirá a mesa cunha ponencia titulada Burela, onde o mar ficou sorprendido de ver tanto labradío mariñeiro; as veciñas Dolores Vispo Ben, Antonina Semedo Lopes e Mª José Rodríguez Pernas, que relatarán as súas experiencias no manexo dos cultivos na súas hortas e o agricultor ecolóxico, Edmundo Maseda, que disertará sobre o manexo ecolóxico dos cultivos”.
A edil popular sinalou que “únense nesta mesa a reflexión sobre a herdanza socio-cultural de Burela e a necesidade de promover actuacións que diminúan o impacto ambiental sobre a biodiversidade do chan, o consumo responsable de auga na produción hortícola, a sensibilización respecto da calidade dos produtos consumidos e a posta en valor dos produtos locais que xeran un menor impacto no medio ambiente”. E lembrou que “precisamente este ano o día mundial do Medio Ambiente ten por obxectivo reducilos desfeitos e as perdas de alimentos promovendo unha campaña cuxo lema é Pensa. Aliméntate. Aforra”.
Desde a Concellería de Medio Ambiente inciden en que “segundo a Organización de Nacións Unidas para a Alimentación e a Agricultura (FAO), cada ano desperdícianse 1,3 billóns de toneladas de comida. Ao mesmo tempo, unha de cada sete persoas do planeta vanse á cama famentas e máis de 20.000 nenos de menores de 5 anos morren de fame cada día”.
Patricia López Eijo subliña que “ata o de agora das 32 actividades inscritas, na conmemoración do Día Mundial do Medio Ambiente, a celebrar en España, Burela é o único representante de Galicia”.