Continúan as Xornadas do Deporte de Imdecum co deporte sen barreiras

O Deporte sen Barreiras protagonizará este xoves, 30 de maio, un novo achegamento ás II Xornadas do Deporte de Imdecum, na voz e traxectoria dos tenistas en cadeira, Álvaro Illobre e Martín Varela, posicións 163ª e 115ª no ránking ITF actual en tenis en cadeira de rodas. Os deportistas, que chegaron onte do Campionato do Mundo WTC Turquía, terán unha cita coa Mariña no IES Monte Castelo de Burela, ás 17.00 horas.

A visita de Illobre e Varela chega á bisbarra como a cuarta experiencia deportiva que enmarca o ciclo da Academia Imdecum, que nesta primavera tamén contou coa presenza da xornalista deportiva Alba Adá; a campioa do mundo de kick-boxing Marisol Ramírez e o director da área de Promoción e Desenvolvemento da Federación Galega de Loita, Pablo Pintos (na fotografía).

O programa formativo da Academia Imdecum porá o broche final o xoves 6 de xuño con fisioculturismo. A iniciativa, que conta ademais coa colaboración da Deputación de Lugo, Fundación Deporte Galego e o IES Monte Castelo, está destinada a alumnado e titulados/as do ciclo superior de Actividades Físicas e Deportivas do centro burelao, monitores deportivos e demais profesionais relacionados co deporte, así como a todo o público interesado.

LOCALIZACIÓN: IES Monte Castelo

HORARIO: 17.00 horas

Xoves 30 de maio

Título: “Deporte sen barreiras”

Relatora: Álvaro Ilobre e Martín Varela, posicións 163ª e 115ª no ránking ITF actual en tenis en cadeira de rodas