ACISA Ribadeo acaba de asinar un convenio con El Farero para ofrecerlles ós seus asociados os servizos de Google Fotos de Negocios. O convenio consiste en realizar fotografías do negocio para permitir ó usuario desprazarse a través do interior do mesmo mediante un tour virtual. Ademais, Google Fotos de Negocios está conectado con Google Maps, Google Places e con Street View e El Farero conta con autorización para ofrecer este servizo a negocios que estean presentes en Google Maps. ACISA e El Farero consideran que “se trata dunha oportunidade de mostrar os negocios de Ribadeo a clientes de todo o mundo, é fácil de atopar para os clientes potenciais e ademais poderán realizar un percorrido virtual panorámico en forma dunha visita on line”. Así, os socios de ACISA, grazas á firma deste convenio suscrito polo presidente de ACISA, Roberto Rivas, e o responsable da empresa Servicios Audiovisuales El Farero, Manuel Vázquez, poderán obter condicións vantaxosas para mostrarse ó mundo. Os interesados en desfrutar de Google Fotos de Negocios poden dirixirse en busca de máis información tanto a ACISA como a El Farero.
