As Radios Comunitarias e libres son esenciais para unha información libre e obxectiva
A sociedade ten dereito, recoñecido pola constitución e pola regulación da UE a unha información libre e obxectiva. O desenvolvemento dese dereito recoñece o dereito á existencia das chamadas radios libres ou radios comunitarias, dereito que en diferentes países se articula pola reserva dunha parte do espectro radioeléctrico para estas emisoras sen ánimo de lucro, sen publicidade, de, por e para a cidadanía.
Ningún dos gobernos que teñen pasado pola Moncloa teñen desenvolvido ese dereito, deixando as emisoras libres actualmente existentes nun limbo legal e impedindo a aparición legal de novas emisoras. O goberno do estado ten pendente adaptar a legalidade vixente para definir as características que estas emisoras teñen que cumprir. Namentres, o goberno galego sacou un concurso, recorrido polas radios libres, que non reserva para elas nada, polo que vai adxudicar ás comerciais a totalidade do espectro, impedindo de feito a continuidade das emisoras existentes así como a aparición doutras novas. Este concurso está por resolverse. Fronte ao recurso das radios libres, o goberno galego di que mentres o goberno do estado non amañe a súa parte, non pode adxudicar espectro ás radios libres. Entre a inacción daqueles e a acción destes, a sociedade galega pode perder a oportunidade de crear medios de comunicación autónomos e independentes.
En maio de 2010 entraba en vigor a nova Lei Xeral de Comunicación Audiovisual, onde se recolle o dereito dos medios comunitarios a ter licencias e se fixa que no prazo dun ano sairá un regulamento que estableza cómo se deben outorgar as licencias. Ese regulamento aínda non saíu. O 29 de marzo do 2012, a Xunta publicou o Decreto 102/2012, que no seu artigo 32 da Sección Terceira establece que a autoridade audiovisual competente pode abrir un trámite de consulta para coñecer aos demandantes dun servizo radiofónico comunitario e, en vista das solicitudes, instar ao órgano competente da Administración do Estado á correspondente reserva de frecuencias. Porén, no canto de facelo e reservar un número de licencias para as radios comunitarias, a Xunta convoca un concurso no que as exclúe. Polo visto a Xunta de Galicia ten previsto facer o censo despois do concurso e entón non haberá licencias nin espectro que repartir. Para ter novas licencias dependerán do goberno central, responsable da planificación do espazo radioeléctrico.
A Xunta de Galicia, nunha actitude de botar balóns fora, di que esperan a que o goberno central habilite os procedementos técnicos e administrativos para asinar frecuencias ás radios comunitarias.
Espazo Ecosocialista ( EcoSoGal ) esixe:
1. Que o goberno da Xunta de Galicia reserve na adxudicación do concurso en marcha un mínimo dun 25% das licencias a repartir para ofertalas a proxectos existentes e mesmo a novas iniciativas de radios comunitarias sen ánimo de lucro.
2. Que solicite oficialmente ao goberno do estado a aceleración dos procesos cara á regulación das radios comunitarias e a reserva dun 25% do espectro para estas iniciativas.
3. Que fomente a creación de emisoras independentes no territorio galego, como ferramenta de comunicación, información, participación e dinamización social.
E trasladara, por medio do grupo parlamentar de AGE, as seguintes iniciativas:
– Liberar/ reservar o espectro radioeléctrico de xeito que non quede “ocupado” cando se resolva o actual concurso, polo que vai ser “técnicamente” imposible satisfacer a demanda das radios comunitarias.
– Que se faga unha revisión das concesións vixentes para saber se cumpren coas condicións dos concursos ( p.e. horas de programación propia, horas de emisión en galego, contratación de persoal, etc…). Nos casos flagrantes, que os hai, que se retire a concesión como esta previsto nas bases e que se reserve para as iniciativas comunitarias.