O Burela FS recibiu a Adrian Martínez como xogador laranxa por un día

O viveirense Adrián Martínez, de 25 anos, foi un dos gañadores do Concurso ‘Futsal Training Day’, que puxo en marcha a LNFS, polo cal todos os afeccionados/as ao Fútbol Sala tiveron a oportunidade de adestrar cos seus ídolos, coñecer os seus segredos de xogo e demostrar as súas habilidades sobre o parqué.

Adrián, porteiro, vestiuse coa camiseta do Burela para poñerse ás ordes de Juanlu Alonso e enfronte dos disparos dos xogadores laranxas o martes pasado.

Semifinais copeiras para Terceira e Xuvenil

A actividade competitiva dos laranxas centrarase esta semana nas semifinais copeiras para a Terceira División e Nacional Xuvenil. Ambos os compromisos disputaranse coincidindo co Día das Letras Galegas.

O equipo xuvenil visitará mañá a pista do ADFS Bueu no encontro de ida, ás 12.00 horas (municipal de Bueu). Despois de impoñerse en Vista Alegre por 2-0 ao Pizzbur Cidade de Viveiro FS, con goles de Bruno e Antón, o Burela FS B xogará a semifinal de volta ás 18.00 horas, no municipal da vila do Landro.