Santiago de Compostela, 30 de maio de 13. O portavoz de Pesca do PSdeG no Parlamento de Galicia, José Ramón Val, congratulouse hoxe polo papel clave dos socialistas á hora de resolver o voto en contra do Protocolo de Pesca con Mauritania.
Coa mesma contundencia, lamentou o rol da conselleira de Pesca, que o mércores apareceu en Bruxelas despois da votación, sen ter mantido ningún encontro previo a mesma co Grupo Socialista para acordar o voto en contra.
Un desprazamento oportunista e que segundo Ramón Val resultaba “innecesario” toda vez que a ausencia de xestión da conselleira fixo que os eurodeputados galegos se tivesen que buscar a vida para conseguir este resultado na votación, que se resolveu por 16 votos en contra do Protocolo, 6 a favor e 1 abstención, sen intervención algunha da Xunta. É máis, a improvisada e oportunista viaxe da conselleira obrigou a alterar o orden do día do Pleno do Parlamento de Galicia para que puidera facela.
“Quedou claro”, engadiu Val, “que o amplo apoio en contra do Protocolo non se debe ás xestións feitas pola conselleira, que foron inexistentes”, polo que so cabe concluír que “foi a Bruxelas, a costa dos galegos, a facerse unha foto e culpar aos demais da súa propia incompetencia” se o resultado da votación fose outro ou “colgarse a medalla” no caso de que se impuxese un voto maioritario en contra do Protocolo, como así foi.
“Todo o mundo traballou para este resultado da votación menos a conselleira, o que proba que nunca estivo na negociación en contra do Protocolo”, engadiu Val.
Por elo, o portavoz de Pesca anticipou que o grupo socialista preguntará o custe desa foto que a conselleira se foi a facer a Bruxelas para pedir que o reintegre ás arcas da Xunta.
En todo caso, e pasando páxina do calamitoso papel da Xunta nesta negociación, Val recomendoulle a Rosa Quintana que o que si debe facer é “viaxar o antes posible a Mauritania para resolver alí os problemas dos cefalopodeiros galegos”.
“Gañamos unha batalla importante, pero os problemas do sector seguen sen estar resoltos e os buques sen faenar”, polo que lle aconsellou de cara ao futuro que “non se quede esperando, outra vez sen facer nada, a votación do Protocolo no Parlamento Europeo e empece a exercer de Goberno, facendo tódalas xestións previas necesarias para que as cousas saian ben sen ter que esperar ata última hora cos dedos cruzados para que así sexa”.