Oito agrupacións de mulleres artesanas da provincia estiveron presentes: a Asociación de Palilleiras de Sarria “Camiño de Santiago”, que exerceron de anfitrionas; o grupo de Palilleiras de Cervo, Burela e Foz; a Asociación Cultural de Quiroga; o grupo “Agulla máxica”, de Lugo; o grupo “Bosque Sagrado”, que reúne a palilleiras de Vilalba, Cerdido, Santaballa e As Pontes; as palilleiras dos Centros Socioculturais lucenses de Lamas de Prado, Trapero Pardo, Milagrosa e Fingoy; a Asociación “As Encaixeiras” de Burela e o grupo “Coas nosas mans” de Xove.
Elas foron as creadoras das 200 pezas que formaron parte da mostra, na súa maior parte, de inspiración tradicional de encaixe galego, aínda que tamén contou pezas realizadas baixo outras técnicas, coma dos chamados tipos ruso, belga (ou binche), ou danés (tonder), coas que confeccionaron prendas de vestir de adulto e neno, complementos decorativos de fogar e de moda, coma chales, broches, sombreiros, abanos ou mesmo xoias, realizadas en liño, fío e seda. Tamén foron mestras de moitos lucenses que se achegaron nalgunha das xornadas sinaladas, durante as que estas ofreceron interesantes demostracións en vivo do seu traballo e leccións prácticas ós asistentes.