Ribadeo, 14 de xuño de 2013.- A Axencia Turismo de Galicia diversifica a oferta turística da Mariña cunha nova ruta en tren que amosa aos visitantes a vila de Ribadeo e o faro de Illa Pancha.
A iniciativa, que foi presentada esta mañá pola delegada territorial da Xunta, Raquel Arias, é froito dun convenio entre a Xunta de Galicia e Renfe que inclúe outras vantaxes para os turistas que visiten a provincia.
Así, Arias explicou a posta en marcha do bono Rail Pass, para peregrinos ou usuarios do ferrocarril, que permitirá utilizar a rede de tren durante dez días dentro do territorio da comunidade autónoma cunha tarifa plana de 49 euros por adulto e 9 por neno.
Polo que respecta ao tren turístico Ruta dos Faros, percorrerá toda a costa norte galega dende Ferrol a Ribadeo, e ven a sumarse á oferta do Rail Pass e á ruta habitual do Transcantábrico.
Raquel Arias destacou “a innovación” desta proposta e incidiu na aposta do Goberno galego por “deseñar unha estratexia para multiplicar o noso potencial turístico, presentando unha oferta diversificada a partir de aquilo que nos singulariza”.
O tren Ruta dos Faros, informou a delegada, permitirá aos turistas que elixan esta forma diferente de viaxar “visitar os acantilados máis espectaculares da nosa costa, disfrutando, en todo momento, de fermosas panorámicas”. Acompañados dun guía especializado coñecerán algúns dos emprazamentos máis característicos da nosa costa, “entre eles a magnífica praia das Catedrais”.
Este servizo recorrerá A Mariña entre o 22 de xuño e o 15 de setembro. Contempla dúas opcións de viaxe, segundo o punto de partida e de regreso xea o propio Ribadeo ou ben sexa Ferrol –facendo igualmente parada en Ribadeo e dando opcións aos pasaxeiros a pernoctar na Mariña-.
Os percorridos catro posibilidades durante os dous días. Os sábados haberá unha ruta longa entre Ferrol-Ribadeo-Ferrol (40 euros por adulto e 10 por nenos) e unha ruta curta entre Ferrol-O Barqueiro-Ferrol (35 euros por adulto e dez por neno). Os domingos, cos mesmos prezos, haberá unha ruta larga entre Ribadeo-Cerdido-Ribadeo e unha ruta curta entre Ribadeo-Ortigueira-Ribadeo.
Neste sentido o tren dos Faros de Galicia visitará o faro de Illa Pancha, para elo o tren chegará á estación de Ribadeo ás 17.20 horas, trasladando ós turistas en autobús ata o faro que se visita.
Estas rutas, apuntou Arias, “inclúen o servizo de guía especializado durante todo o percorrido, que axudará a coñecer e comprender as paisaxes e a historia dos lugares que se recorren”. No caso de Ribadeo, acompañará aos turistas ao faro de Illa Pancha e á praia das Catedrais.
Arias sinalou tamén que este ano visitará Galicia o tren de luxo Al-Andalus que fará un percorrido por Galicia de tres días no que tamén se inclúe a nosa provincia. O tren, composto de material restaurado preservando o estilo belle epoque dos vehículos orixinais do ano 1920, ten unha capacidade máxima de 64 viaxeiros distribuídos en 12 suites estándar e 20 suites superior.
No acto de presentación da nova ruta turística, Arias estivo acompañada polo presidente da Mancomunidade de Municipios da Mariña, Alfonso Fuente Parga, e o subdelegado do Goberno, Ramón Carballo.