Lugo, 12 de xuño de 2013.- A delegada territorial da Xunta en Lugo, Raquel Arias, e o director do Instituto Galego de Promoción Económica, Javier Aguilera, presentaron hoxe as novas axudas do Igape para impulsar o crecemento, a competitividade e a internacionalización das empresas lucenses. Durante unha xornada técnica desenvolvida na sede da Escola de Empresarios (CEL), coincidiron en salientar que a discriminación positiva do Impulsa Lugo converte á provincia nunha zona privilexiada para os proxectos empresariais.
Neste senso, Arias salientou que o Impulsa e a futura Lei do Emprendedor potenciarán Lugo como un ecosistema propicio para a creación de novas empresas. Destacou ademais que ese apoio é global por parte da Xunta, o que se traduce en varias liñas de axuda para investimentos abertas por diferentes consellerías, que inclúen medidas de discriminación positiva para Lugo.
Como parte das medidas de respaldo do goberno galego ao tecido económico, Javier Aguilera destacou que os emprendedores de Lugo xa teñen á súa disposición o programa reEmprende, con apoios mínimos garantidos do 25% nesta provincia. Subliñou ademais que os creadores de novos negocios poden cubrir ata o 50% dos investimentos, de ata 500.000 euros, ben sexan en novos negocios ou en empresas de recente creación.
O director do Igape sinalou que a Consellería de Economía e Industria está a habilitar vías para o financiamento de todo tipo de proxectos empresariais, desde os apoios a grandes investimentos ata os microcréditos para os pequenos proxectos de autónomos e microempresas. E no eido da internacionalización, salientou que o número de empresas de Lugo que exportan medrou un 14% durante o último ano, e lembrou que o Igape dispón dun amplo abano de servizos e axudas para manter os apoios na procura doutros mercados.
Na xornada desenvolvida esta tarde participaron tamén o director de Competitividade do Igape, Norberto Penedo, e o director de zona de Afigal, José Luis Feijoo Alonso.