Segundo explicou Estoa “desde que comezou a crise económica, na mesma proporción que se ían suprimindo determinados impostos, como o imposto sobre o patrimonio, que gravaba a aqueles que máis teñen, paralelamente se ían poñendo en marcha políticas en materia fiscal e económica que prexudicaban directamente ao conxunto da cidadanía”.
“Exemplo diso – continuou Estoa- é a suba de impostos indirectos, como o das persoas físicas ou o IVE, que afecta directamente ao consumo e, en consecuencia, retrotrae a demanda interna. En definitiva, desde que están no goberno, os populares están a desenvolver unha política fiscal que fai bo o lema da nosa campaña: ‘Non é unha crise. É un roubo!’.
Asemade, dende o BNG acusan ao goberno do Estado de utilizar a crise como coartada para impoñer un modelo determinado de centralización en base ao reforzamento das competencias nas capitais de provincia. Neste senso, Estoa insistiu en que “o Ministerio de Facenda está desmantelando as pequenas oficinas da Axencia Tributaria como é o caso da de Foz, na Mariña, ou a de Monforte, na zona Sur de Lugo, e concentrando os servizos na capital. Parécenos absolutamente irracional que a folla de ruta última do goberno do Estado pase por pechar a oficina de Facenda de Foz xa que isto vai na dirección de separar os servizos da cidadanía”.
Por todo isto, dende o BNG, a través da súa campaña “Non é unha crise, é un roubo!” pretende mobilizar ás mariñás e aos mariñáns fronte a estas políticas de recorte e austeridade que está a exercer o Partido Popular e que “forman parte dunha estratexia de desmantelamento dos servizos públicos nas comarcas, así como dos dereitos básicos da súa poboación”.