A proposta formulada polo alcalde, José María González Barcia, recolle basicamente o seguinte:
“Ante a situación xerada pola recente sentencia do Tribunal Supremo en relación coa devolución da colección cedida no seu día por Alvaro Gil Varela ó Museo Provincial de Lugo á familia do indicado mecenas, colección na que se atopa incluído o torques de Burela, emblema que nos distingue como concello e como pobo, que forma parte do noso escudo de forma sobranceira, que tamén é emblema do propio Museo e mesmo da provincia, a Corporación Municipal do Concello de Burela quere mostrar a súa preocupación ante o que pode chegar a ser unha perda irreparable do patrimonio cultural da nosa provincia, tendo en conta o valor cultural e artístico das pezas que forman parte da indicada colección, especialmente a colección de ourivería da que, como queda indicado, forma parte o torques. Por iso, solicitamos do Presidente da Deputación, José Ramón Gómez Besteiro, como presidente da institución que representa a todos os concellos da provincia, que realice todas as xestións tendentes a garantir a presenza do torques de Burela e da indicada colección nas dependencias do Museo Provincial de Lugo, para que todos os veciños e veciñas desta provincia, nomeadamente os de Burela, poidamos admirar o noso torques. Así mesmo, mostrámoslle o noso apoio para que esta situación, que consideramos preocupante, se resolva canto antes, do xeito anteriormente expresado.”
O portavoz do equipo de goberno, Manuel Fernández Valle, manifestou que “o noso grupo, como non podía ser de outro xeito, apoia a proposta do alcalde por varios motivos, pero fundamentalmente porque estamos moi preocupados porque o torques poida irse da provincia, e iso non podemos permitir que ocorra; e porque a proposta que se formula desde a Alcaldía pretende sacar esta cuestión do debate político”.
Fernández Valle quixo mostrar tamén a satisfacción do Grupo Popular polo apoio dos grupos da oposición á proposta do alcalde: “deste xeito, a proposta irá asinada polo alcalde e os tres portavoces no nome da Corporación Municipal do noso Concello”. Finalmente, o portavoz do equipo de goberno manifestou que “todos somos conscientes de que a situación é moi grave, e que en calquera momento se pode pedir a execución da sentencia por parte da familia; ese é motivo polo que lle pedimos unha certa celeridade ó presidente da Deputación de Lugo, que é quen ten que liderar este proceso”.