Lugo, 30 de xullo de 2013. Mario Outeiro, portavoz do BNG na Deputación de Lugo e delegado de Turismo na Deputación lucense, destacou, no pleno celebrado esta mañá, o incremento do número de viaxeiros nos catamaráns que xestiona a institución provincial e acusou ao Grupo do Partido Popular de “actuar de mala fe e de falar do que non sabe” cando afirma que as campañas turísticas na Ribeira Sacra non están a ser un éxito.
Neste senso, Outeiro informou de que no catamarán de Doade o número de viaxeiros no que vai de 2013 foi de 9.052 fronte aos 7.476 de 2012, no de Belesar, ascende xa a 1.555 fronte aos 761 do exercicio anterior, e no dos Robles a estas alturas é de 754 viaxeiros superando aos 120 de 2012. “Os números non deixan dúbidas sobre o incremento espectacular do número de viaxeiros nos catamaráns da Ribeira Sacra e este é un dato fundamental para valorar o éxito ou fracaso das campañas turísticas que se desenvolven”, puntualizou o delegado provincial quen tamén insistiu en que os datos desmontan as valoracións infundadas dos populares. “As opinións do Partido Popular teñen pouco valor e aínda menos as que se refiren a que os clubs náuticos se atopan fechados cando o único que está nesa situación é o de Doade e os outros se atopan en proceso de licitación”.
Para o responsábel da área de Turismo provincial “o Partido Popular é o menos indicado en falar do sector turístico cando, excepto no Mediterráneo, a súa política económica está a provocar unha severa diminución do número de turistas e do gasto que estes realizan durante a súa estancia”.
Os nacionalistas piden que os populares que cobraron diñeiro negro invistan as cantidades percibidas en políticas sociais
Durante o debate da moción presentada polo Grupo Provincial do Partido Popular na que se solicitaba o reintegro dos salarios percibidos por Xoán Antón Estúa, os deputados nacionalistas pediron aos populares que conviden aos membros do seu partido que recoñeceron cobrar sobresoldos da contabilidade B cando Bárcenas era tesoureiro da formación a que destinen o cobrado a gastos sociais.
Sobre este asunto, Veiga lembrou que Xoán Antón Estúa foi nomeado como persoal administrativo de apoio ao Grupo Provincial do Bloque Nacionalista Galego por decreto do 8 de agosto de 2011 e non como persoal eventual de gabinete, e así aparece, tamén, na Relación de Postos de Trallado de 2012, publicada no Boletín Oficial da Provincia do 2 de febreiro de 2012 e na de 2013, publicada o 27 de febreiro de 2013.
“Os membros do Grupo Provincial do PP –continuou Veiga- saben que menten e non lles importa, porque o seu partido é o partido do diñeiro negro, dos sobresoldos e dos enganos. Para dar leccións de ética, señora Candia, a alforxa non ten que estar chea de votos, senón cargada de honradez; algo que no seu partido non existe. Non estamos dispostos a asumir leccións do partido de Bárcenas, do partido da Gürtel, do partido que recorta dereitos e poder adquisitivo aos cidadáns e despois remunera aos seus cargos con sobres cheos de diñeiro negro, do partido que se financia das mordidas das grandes obras públicas o que repercute na calidade das mesmas e que incluso podería por en perigo vidas humanas. En definitiva, non estamos dispostos a recibir leccións de ética dunha forza política que non ten un mínimo de humanidade. O que ten que facer é convidar aos membros do seu partido que recoñeceron cobrar sobresoldos, como Pío García Escudero, compañeiro no Senado do lucense Xosé Manuel Barreiro, ou Ignacio del Burgo, a investir eses cartos en accións sociais”.
O vicepresidente da Deputación concluíu este asunto pedindo ao Partido Popular lucense que explique as súas contas; “queremos saber se os sobres e o diñeiro a toca tella é tamén unha práctica habitual entre os dirixentes do PP en Lugo”.
Pensións do estranxeiro
Por outra parte, a Deputación aprobou cos votos a favor do equipo de goberno a moción na que se insta ao Goberno do Estado a paralizar os expedientes sancionadores iniciados pola Axencia Tributaria contra os emigrantes que se benefician de pensións consolidadas no estranxeiro e que non declararon até o de agora.
Tal e como defendeu Mario Outeiro, “é inadmisíbel e inmoral que mentres aos evasores fiscais se lles conceden amnistías, aos emigrantes retornados, que se viron obrigados a abandonar o país en busca dunha vida digna, se lles ameace con sancións que roldan os 15.000 euros pero que incluso poden chegar aos 110.000 euros e lles prometan flexibilidade para facer os pagos. É un ataque aos nosos maiores que están a ser o único sustento de moitas familias”.
Na moción recórdase que os afectados nunca recibiron información en relación á súa obriga de declararen as contías das pensións percibidas no estranxeiro. Existía un total descoñecemento da obriga de facer a declaración anual do Imposto da Renda sobre Persoas Físicas o que confirma a falla de intencionalidade para defraudar. Ademais, os estados pagadores nunca expediron ningunha certificación en relación ás cantidades percibidas.