Cuberto o 75% do aforo da Casa da Cultura de Burela para o concerto do violinista libanés Ara Malikian

Burela, 9 de xullo de 2013. O 75% do aforo da Casa da Cultura xa está cuberto para o concerto que ofrecerá este mércores 10 de xullo ás 21 horas o violinista de orixe libanés Ara Malikian, segundo os datos que acaba de dar o alcalde, José Mª González Barcia.

En total hai máis de 600 entradas reservadas, que poderán ser retiradas en taquilla a partires das 20 horas. As que resten ata completar o aforo poranse á venda nese momento ao prezo de 10 euros.
As portas da Casa da Cultura abriranse a partires das 20:30 horas para que a xente vaia accedendo ata o auditorio, pouco a pouco. O concerto dará comezo ás 21 horas.

Pola tarde Malikian impartirá unha clase maxistral diante do profesorado e do alumnado da Escola Municipal de Música de Burela e dos asistentes das escolas e centros de ensino musicais da Mariña que foron convidados a este acto.

Esta máster class terá lugar entre as 17 e as 19 horas, segundo informaba o director da Escola de Música de Burela, Xan Carballal.

Ara Malikian atenderá aos medios de comunicación, acompañado polo alcalde de Burela, José Mª González Barcia, a partires das 16:45 horas na Casa da Cultura.