Gómez Besteiro encara a renovación do partido “con máis forza ca nunca” tras unha semana con visitas nas catro provincias

José Ramón Gómez Besteiro, aspirante á secretaría xeral do PSdeG, encara o proceso de renovación do partido “con máis forza ca nunca” despois de pechar unha semana con visitas nas catro provincias galegas cunha gran afluencia de militantes, que foron máis de 150 en Mondariz, cos compañeiros e compañeiras de Baixo Miño-Paradanta, e medio millar onte en Lugo.

Gómez Besteiro visitou tamén con decenas de militantes as comarcas de Ribadavia e O Carballiño, en Ourense, e de Compostela, antes de participar esta fin de semana en Madrid no Comité Federal do partido, no que se aprobará a folla de ruta do proceso de elección de candidatos para o PSdeG co horizonte de setembro fixado xa polo Comité Nacional en Galicia. O socialista encara esta recta final, na que seguirá realizando visitas por toda Galicia, “con máis forza ca nunca” tras o apoio recibido e “co convencemento de que o partido sairá unido e moi reforzado” para iniciar “un proxecto de futuro que demostre que Galicia pode saír da crise sen renunciar á igualdade e a xustiza social, ao contrario do que quere facer crer o PP”.