José Ginzo, bronce no Campionato de Asturias de 5.000 metros

O ribadense José Ginzo, que milita nas filas do Club Atletismo Occidente de Navia, conseguiu o pasado sábado nas pistas do complexo deportivo de San Lázaro de Oviedo un valioso bronce no Campionato de Asturias de 5.000 metros.

O fondista mariñán conseguiu unha marca de 16:58 e so foi superado por Pablo Alonso (14:49) do Universidad de Oviedo e Francisco López de Dios (16:33) do Cerezal Team, ouro e prata respectivamente.

O atleta ribadense xa conseguira o pasado mes de abril o campionato de Asturias de maratón, e en breve empezará a preparar o campionato de Asturias de media maratón, que este ano se celebrará no mes de outubro en Sama de Langreo.

Foto: Juan Pablo Carbajales Suárez. Ginzo co dorsal 61 nunha foto de arquivo.