O circo Chosco fixo disfrutar aos nen@s nunha nova sesión de ‘Mércores Miúdos’

Lugo, 10 de xullo de 2013. Máis dun cento de nenos e nenas lucenses, acompañados polas súas familias, disfrutaron dun novo mércores miúdo nos xardíns da Deputación. Nesta ocasión, fixérono cunha versión do espectáculo Chosco¡, da compañía Circo Chosco. Unha posta en escena case sen fala na que se mesturan comedia e circo e que ten como resultado unha obra cómica con acrobacia, malabar e outras técnicas nas que o público se viu implicado.

Circo Chosco trae este espectáculo a través de dous personaxes, dous problemas, dous descarados que realizaron unha escenografía chea de trampas, golpes, maxia, fracasos, éxitos, bágoas e risas, sobre todo risas e moito circo.

Os mércores miúdos forman parte do programa Cultura Aberta, unha iniciativa da área de Cultura e Turismo da Deputación de Lugo que se organiza por sexto ano consecutivo e coa que se pretende ofrecer propostas de lecer e culturais durante o mes de xullo e a dúas primeiras semanas de agosto, na que tamén se aglutinan os Martes de Cine Social, os Xoves de Cultura aberta e dous Venres de Teatro con Roberto Vidal Bolaño.