Mario Outeiro confirmou a falsidade das declaracións dos populares presentando o documento, con data de 2 de agosto de 2011, no que se recolle o nomeamento de Xoán Antón Estúa García como administrativo con carácter de persoal eventual adscrito ao Grupo Provincial do BNG, e non á Deputación Provincial de Lugo como pretenderon dar a entender dende o Partido Popular. (Ver documento anexo).
No Boletín Oficial da Provincia de Lugo do 23 de agosto de 2011 aparece reflectida esta información, a través do seguinte texto: “(…) esta Presidencia resolve: nomear con carácter de persoal eventual, coas condicións sinaladas no acordo plenario citado adscrito ao Grupo Provincial do BNG, para prestar as súas funcións ao Portavoz do Grupo Provincial do BNG, D. Mario Outeiro Iglesias, a D. Xoán Antón Estúa García”.
A este respecto, o portavoz nacionalista recordou que “o Grupo Provincial do Partido Popular conta, a día de hoxe, con tres administrativos adscritos na sede do seu partido e incidiu en que a contratación de todos os traballadores dos grupos provinciais se levou a cabo a partires dun acordo unánime entre os partidos representados no organismo provincial”.
Para o BNG “isto ou obedece a unha estratexia para crear unha cortina de fume para tapar o maior escándalo de corrupción da historia recente relativa os sobresoldos do Partido Popular e o caso Bárcenas ou é a demostración palpable da falta de traballo da voceira dos populares na Deputación de Lugo, posto que no Pleno Provincial do pasado mes de xuño xa se aclararan os termos desta contratación, a petición de Elena Candia”.
De seguir nesta liña de mentiras e falsas acusacións, “os nacionalistas vamos estudar a presentación de alegacións legais contra a campaña de difamación emprendida polo partido popular en contra dun dos traballadores do noso Grupo Provincial”, sentenciou Mario Outeiro.