CERVO, 2 DE XULLO. Os membros do Grupo Municipal Socialista de Cervo alertan ó equipo de goberno das carencias da rede de saneamento dos núcleos de Cervo e Figuerido, “son moitos os veciños que nos trasladaron as súas queixas, sufren diariamente os malos olores desprendidos de dito sistema de depuración. Pedimos que se poña solución con urxencia a este problema e se revisen as obras para evitar posibles verquidos ó río”.
Os socialistas corroboraron “in situ” esta situación, “este novo sistema instalado na zona das Quintas parece non dar os resultados requeridos. O mal cheiro pode ir en aumento co incremento das temperaturas na época estival. Debemos atallar canto antes o problema para evitar máis prexuízos a veciños e visitantes”.
Por todo, o GMS presentou no Concello unha solicitude para que “o goberno faga as xestións oportunas, esixa responsabilidades a quen teña competencia e se nos manteña informados de cada paso que dan. Todo coa maior celeridade posible para non ver empeorada a situación”.