Ribadeo, 12 de xullo de 2013. A Concellaría de Servizos Sociais segue a cumprir prazos co banco de préstamo de libros de texto. Os interesados en beneficiarse desta iniciativa teñen ata o 19 de xullo para realizar as solicitudes formais e presentar a documentación correspondente.
Segundo explica Teresa González Piñeiroa “o único que teñen que facer é pasarse polas mañás polos Servizos Sociais no auditorio municipal de Ribadeo a cumprimentar toda a documentación. A nosa intención é entregar xa eses libros de texto entre o 22 e o 26 de xullo para que despois as familias fagan os seus cálculos e saiban qué libros precisan mercar e cales non de cara ao inicio do vindeiro curso 2013/2014”.
Este banco de préstamo de libros de texto comezou a súa andadura a finais do pasado mes de xuño. Todas as persoas que quixeron acudiron a deixar os seus exemplares entre o 21 de xuño e o 5 de xullo, “e desde día 5 e ata o 19 de xullo é o prazo que teñen as familias para presentar as solicitudes formais e así beneficiarse desta campaña”.