Silvia, de tan só 17 anos, amosouse moi emocionada cos novos retos: “Os éxitos da tempada pasada abrirannos as portas de competicións que son todo un caramelo, competicións que carrexan unha motivación e unha ilusión extra. Na liga tamén respiraremos un aire especial, con dez derbis autonómicos, unha liga que pon de relevancia o bo traballo que está facendo polo deporte feminino en Galicia”.
A xoia laranxa quixo agradecer todas as mostras de cariño recibidas polo histórico dobrete e animou á xuventude mariñá para seguir gozando do mundo do futsal: “Para nós é unha honra que nos fagan ver como referentes de tantas e tantas nenas ás que lles gusta o fútbol sala ou calquera outro deporte na Mariña. Eu anímoas a que sigan practicando e traballando porque o fútbol sala lles vai facer vivir momentos moi bos, momentos que só o día a día do deporte é capaz de proporcionar“ explicaba Silvia, que este ano compatibilizará o seu labor na elite futbolística cos estudos de Educación Infantil en Ribadeo.
A burelá convértese na novena xogadora do cadro co que comezará Quico Otero a preparar a pretempada a partir da próxima semana, coas renovacións de Lidia Mesías, Peque, Maite, Jozi, Lara e Paula, o regreso da focega Claudia, dende o Valladolid FS, e a incorporación da ala-peche Bea Mateos, procedente do Orvina.