Máis de 30 crianzas procedentes dos campamentos de refuxiados de Tindouf, Arxelia, están pasando os meses de verán en familias de acollida na provincia de Lugo, grazas a este programa que ten como obxectivos promover valores como a solidariedade e a tolerancia na sociedade galega, facilitando así a súa convivencia e integración, ao mesmo tempo que ofrece unha alternativa de ocio que lle permite aos nenos e nenas saharauís evitar a súa estancia nos campamentos durante os meses de xullo e agosto, nos que se rexistran temperaturas moi elevadas no seu lugar de orixe.
Neste sentido, Antonio Veiga explicou que “dende a Vicepresidencia da Deputación de Lugo cremos que as familias están facendo un labor digno de loar, sobre todo en épocas nas que a situación económica non é moi favorable. Así mesmo, queremos amosar a nosa solidariedade con estes nenos e nenas e con todo o seu pobo, a nosa solidariedade na loita deste pobo pola súa soberanía en contra da tiranía que exerce Marrocos violando as resolucións de Nacións Unidas que deixan claro o dereito a autodeterminación”.
“A xornada de convivencia de hoxe – continuou o vicepresidente- con estes nenos e nenas que sofren as consecuencias deste conflito, pretende ser, tamén, un recordo cara todos aqueles que se atopan nos territorios que o Estado de Marrocos mantén ocupados co obxectivo de quitarllos a aqueles que teñen o dereito sobre eles. Os nacionalistas galegos tamén sabemos o que é o xenocidio cultural e a privación das liberdades nacionais, polo que tamén nos sentimos parte do pobo saharauí; compartimos con el a loita por dotarnos dun Estado propio”.
Para completar a xornada, as rapazas e rapaces viaxaron ata o Parque Zoolóxico Marcelle Natureza, onde puideron coñecer máis sobre o medio ambiente e a diversidade biolóxica da zona visitando o seu bosque autóctono habitado por multitude de animais en liberdade, e onde puideron desfrutar dun xantar todos xuntos.