CERVO, 19 DE AGOSTO. Os membros do Grupo Municipal Socialista de Cervo veñen de rexistrar unha solicitude no Concello para coñecer de primeira man os acordos acadados na reunión mantida a semana pasada entre o alcalde, Alfonso Villares, e representantes das empresas madeireiras que traballan no municipio, “esta mañá solicitamos que o equipo de goberno nos permita saber as conclusións ás que chegaron neste encontro”.
Estas empresas utilizan para o seu beneficio os camiños de titularidade pública, “estamos totalmente de acordo en que se comprometan a facerse cargo da reparación e arranxo das vías que resultaron danadas polo seu traballo. É importante que ambas partes amosen unha boa actitude xa que falamos dunha actividade con peso na nosa economía”.
De todas formas, os socialistas agardan que a xuntanza sexa fructífera, “non valerá de nada se as medidas acordadas non se fan efectivas”. Lembraron que “non sería a primeira vez que non vemos os resultados prometidos. O señor Villares, máis ou menos cada dous anos, fai esta mesma manobra de anunciar un acordo coas madeireiras. Se recollemos as súas propias palabras, no 2009 aludía ó obxecto de garantir o bo uso dos servizos e accesos de titularidade municipal no proceso dos aproveitamentos forestais do monte e garantir en todo momento a súa correcta conservación, no 2011 repetía que co convenio se garantía a conservación e o bo uso das vías, servizos e accesos de titularidade municipal no proceso dos aproveitamentos forestais do monte e a día de hoxe, volvemos a ler o mesmo. Moi boas palabras que sempre caen en saco roto porque non se fai nunca nada do que se acorda e se non que lle pregunten ós veciños a súa opinión”.
Engaden que “queremos saber as medidas que se van a tomar para esixir que se leven a cabo. Queda moi ben reunirse e sacar a foto pero o máis importante é ver os resultados”.