O alcalde, Fernando Suárez, recoñeceu “o duro e perigoso traballo que realizan as percebeiras para extraer este manxar que ten tanta aceptación”. O rexedor amosouse convencido de que “este será un ano máis de troula e de festa aquí en Rinlo. Milleiros de persoas se achegarán a degustar os centos de quilos de percebes que se poñen á venda e que afortunadamente sempre se acaban vendendo todos”.
Suárez Barcia agarda que o tempo acompañe, “pero sabemos que este evento, que inventamos hai dez anos e que agora está perfectamente consolidado para Rinlo como parroquia ribadense, é unha referencia obrigada á que queremos convidar aos veciños, aos amigos e aos visitantes tanto da Mariña como do Occidente asturiano para que veñan ao longo do sábado aquí a Rinlo. A partires das 12 do mediodía comezarán a venderse as racións de percebes ata a noitiña. Aquí tamén haberá gaitas, música e unha serie de actividades para pasar un día fenomenal coa familia e cos amigos en Rinlo”.
Na carpa instalada no porto poñeranse á venda arredor de 600 quilos de percebes. O prezo da ración de 250 gramos será de 12 euros. A maiores están os bares e os restaurantes de Rinlo que tamén despacharán este produto.