Vicepresidencia da Deputación colabora un ano máis co Club Kayak de Foz

Foz, 3 de agosto de 2013. O vicepresidente da Deputación e responsábel das áreas de Benestar Social e Deporte, o nacionalista Antonio Veiga, vén de asinar un convenio de colaboración, por valor de 7.000 euros, co club kayak de Foz, para financiar os gastos derivados das súas actividades, entre as que se atopa a LI Travesía Ría de Foz, que se vai celebrar mañá, 4 de agosto.“Este convenio é unha proba máis do compromiso que ten adquirido a área de Benestar Social e Deporte da Deputación de Lugo co deporte de base e cos deportes náuticos, todo un referente nesta comarca”, precisou Veiga.

A LI Travesía Ría de Foz, disputarase mañá domingo, 4 de agosto, dentro da XVIII Copa Galega de ríos e travesías, na que se espera participen todos os equipos inscritos na Liga Galega de Piragüismo, o que se traduce en máis de medio centenar de padexeiras e padexeiros, distribuídos nas categorías sénior, júnior, cadete e veterana. Haberá premios para os tres primeiros clasificados de cada categoría e para os tres primeiros clubs, que se entregarán ao finalizar a regata.

“Estamos ante a segunda travesía máis antiga de Galiza, e a terceira máis antiga do Estado, tralo descenso do Sella e o descenso do Miño, e polo tanto é unha das citas máis importantes do calendario mariñao, converténdose nun elemento de atracción turísitica tanto para Foz e arredores”, concluíu o vicepresidente.