As actividades comezarán o venres 23 de agosto, día do Neno, ás 10.00 horas con talleres de manualidades e reciclaxe para nenos de 4 a 12 anos na Aula de Formación, da man da Mancomunidade de Concellos da Mariña. É preciso inscribirse con antelación no teléfono 982 592 001.
Ás catro da tarde, co programa LER CONTA MOITO, da Consellería de Cultura e Educación, os nenos e nenas poderán desfrutar unha sesión de maxia Chrystyan Magic na Senda da Serpe Alada que se desenvolverá no salón de actos do Centro Cívico.
E ás cinco da tarde, na praza do Concello, parque infantil DIVERNENO, que se celebrará no pavillón municipal no caso de que chova.
O sábado 24 de agosto celebrarase a festa na honra a San Bartolo e á Virxe do Carme. Banda TAU de Viveiro ofrecerán pasarrúas polas mañás e á unha do mediodía celebrarase a misa solemne coa participación da Orquestra Clásica de Xove. Xa a partir das dúas a orquestra Capricho ofrecerá unha sesión vermú e repetirá ás dez da noite acompañando á orquestra Sintonía de Vigo na verbena.
O luns 26 de agosto, festivo local, dende as 10.00 ás 13.00 horas e das 17.00 ás 21.00 horas, SOGAMA ofrecerá un xogo de reciclaxe dentro dunha carpa na praza do Centro Cívico. Trátase dunha campaña de información e concienciación sobre a recollida selectiva e a reciclaxe en concellos galegos coa finalidade de reducir os impropios.
E ás doce do mediodía, dentro do programa FalaRedes da Consellería de Cultura e Educación, Uxía ofrecerá un concerto no Salón de Actos do Centro Cívico coa compaña de Sergio Tannus. “Rosalía pequeniña” pretende achegar aos nenos e nenas a obra de Rosalía de Castro no 150 aniversario da publicación de Cantares Gallegos.
Exposicións
Ademais, poderanse visitar dúas exposicións. “Xove 360º – Éche así!” é unha exposición fotográfica que permanecerá aberta do 14 de agosto ao 6 de setembro no Centro Cívico en horario de 11.00 a 13.30 e de 18.00 a 22.00 horas. Así mesmo, “Coas nosas mans VI” poderase visitar na sala da Oficina de Turismo do 22 ao 31 de agosto.
Dende o Concello solicitan a colaboración dos veciños para unha exposición que se pretende organizar con motivo das festas do vindeiro ano. Así, agradecen aos veciños que poidan achegar fotografías antigas do Concello.