Cervo, 20 de setembro de 2013-O Concello de Cervo vén de recibir un aviso de Capitanía Marítima de Burela no que se informa de que o próximo luns día 23 de setembro, durante a preamar da tarde, realizaranse voladuras subacuáticas en augas próximas ao polígono de Cuíña. A empresa Marcor Xove efectuará as voladuras, necesarias para a continuación das obras do emisario submarino para o saneamento de San Cibrao que financia a Xunta de Galicia.
Así, e por motivos de seguridade, Capitanía Marítima de Burela prohibe o baño, a navegación, a pesca submarina, a inmersión ou calquera outra actividade náutica nun radio de “500 metros ao redor do punto de traballo, situado a uns 290 metros da liña do deslinde marítimo-terrestre, ao norte da empresa Acuidoro, no polígono industrial” tal e como di literalmente o comunicado remitido.
Un texto que Capitanía Marítima enviou a numerosas institucións, organismos e entidades implicadas, moitas delas de carácter marítimo-pesqueiro, para facilitar o xeral coñecemento desta información.