O Concello do Vicedo presenta a súa axenda de actividades culturais para este mes de setembro que inclúe a proxección de dúas películas, unha tarde-noite de xogos de mesa e a actuación de Uxía coa súa montaxe ‘Rosalía pequeniña’. Este xoves 5 de setembro, proxectarase na Casa da Cultura ‘La invención de Hugo’ a partir das 22.00 horas. O xoves día 12 será a quenda de ‘Skyfall’ á mesma hora; mentres que o venres 20 celebrarase unha xornada de xogos de mesa con Cifras e Letras, Monopoly, Scrabble, Tabú, etc a partir das 18.00 horas para nenos e nenas de 7 a 14 anos e a partir das 22.00 horas para maiores. Finalmente, o martes 24 de setembro Uxía achegarase á Casa da Cultura do Vicedo para presentar ‘Rosalía pequeniña’ a partir das 16.00 horas.