A delegada subliñou que nos últimos meses houbo unha estreita colaboración entre a empresa e os servizos de emerxencia da Xunta, que “durante este tempo ofreceron apoio técnico para a redaccións dos plans de actuación municipais, determinaron os puntos de encontro en caso de evacuación ou informaron a todos os axentes implicados de como actuar en caso de accidente”.
Os plans de emerxencia determinan as accións a adoptar no suposto de que se produza unha emerxencia derivada dunha incidencia no depósito de barros vermellos ou na presa do río Covo e o dique de Collado, que afectarían en caso de rotura aos núcleos de San Cibrao (Cervo) e Xove respectivamente.
A delegada territorial sinalou que “aínda que o risco de que iso se produza é moi reducido, é precisa a implantación e difusión entre a poboación destes plans de emerxencia para minimizar os efectos dun accidente chegado o caso”.
Así, Alcoa instalou nas zonas de afección sirenas de aviso á poboación, que se activarán en caso de rotura das infraestruturas sinaladas. Nos vindeiros días deseñarase a campaña de información aos veciños e veciñas sobre as medidas de autoprotección que deben adoptar no caso de que se active o plan de emerxencia.
Na xuntanza deste participaron tamén os alcaldes de Cervo e Xove, Alfonso Villares e Demetrio Salgueiro, responsables da multinacional, así como representantes dos servizos de Protección Civil e de Prevención e Análise de Riscos, ambos da Dirección Xeral de Emerxencias e Interior.
Previamente, técnicos de Protección Civil e de Augas de Galicia inspeccionaron as instalacións de río Covo e Xove para comprobar unha vez máis a idoneidade dos plans elaborados.