Lugo 16 de outubro de 2013.- O presidente da Comisión Organizadora do VII Congreso provincial de Novas Xeracións de Lugo (COC), Alberto García, fixo público este martes que Daniel Vega é o único aspirante a presidir a agrupación político xuvenil vinculada cos populares.
Así o puxo de manifesto o presidente do COC tras que se pechase o prazo para a presentación de candidaturas e tras ser verificadas pola comisión as firmas presentadas polo popular, Daniel Vega.
Alberto García informa que o que ata agora foi presidente da agrupación provincial presentou un total de 120 apoios, o que supón un 41% máis dos necesarios para obter a condición de candidato.
Polo tanto, Daniel Vega é o único aspirante que opta a presidir Novas Xeracións da Provincia tras o próximo congreso, que terá lugar o día 2 de novembro, ao que concorrerá logo de que a súa candidatura sexa avalada por un 20% de sinaturas de compromisarios.
Daniel Vega foi o presidente de Novas Xeracións da Provincia de Lugo durante a última lexislatura, e, polo tanto, opta agora á reelección no cargo.