Barcia cualificou o acontecido como “unha perda cultural irreparable para o conxunto da provincia. Independentemente do valor económico, a colección de ourivería dos Gil Varela, na que se engloba o Torques, ten un valor cultural que non se pode cuantificar, e deixar perder este patrimonio cultural é unha enorme irresponsabilidade. Polo que afecta a Burela, a saída do Torques do Museo é como se arrancáramos o Torques do escudo e da bandeira do noso concello. Non hai que esquecer que o Torques forma parte da nosa razón de ser como bureleses, é o símbolo das nosas raíces como comunidade. E que se vaia do Museo vén a ser como se nos arrancaran o que sentimos como noso”.
O alcalde burelés entende que “neste asunto ten que haber responsabilidades políticas. E o responsable político da Deputación é o Sr. Gómez Besteiro. Este señor ten que cargarse de humildade e dar a cara ante os cidadáns desta provincia en xeral e de Burela en particular, para, primeiro, pedir desculpas por non ser capaz de resolver en seis anos un problema que efectivamente herdou, pero que tivo tempo para arranxar. E segundo para explicar o que se fixo para que o Torques quedase no Museo, se é que se fixo algo, e o que non se fixo; para explicar o porqué do comportamento da Deputación de Lugo e por qué non se actuou doutro xeito tendente a conservar este importante patrimonio cultural”.
González Barcia dixo: “entendo que o Sr. Besteiro está máis preocupado polo seu medre persoal dentro do seu partido ca en defender os intereses da provincia de Lugo; por iso creo que non lle dedicou a este asunto o tempo que lle tiña que dedicar, algo tamén moi propio del. Pero tamén digo que unha persoa que defende así os intereses da provincia, non creo que estea capacitado para facer nada noutro ámbito político de actuación”.
O alcalde burelés afirmou que “a partires de agora, ós rapaces e rapazas de Burela e da provincia só lles quedará acercarse a esta Casa da Cultura para, a través desta reprodución do Torques poder adiviñar a riqueza e o esplendor desta peza única, da que o Sr. Besteiro nos ten privado poida que para sempre”.
González Barcia finalizou dicindo que “xa estamos estudando conxuntamente co grupo provincial popular e a dirección provincial do partido as posibles medidas a adoptar. Unha delas pasaría pola reprobación do Sr. Besteiro no pleno da Corporación Municipal de Burela, como mostra do noso rexeitamento á súa forma de proceder. Envieille en dúas ocasións outras tantas peticións de entrevista para que me explicase as xestións que se estaban a facer e mostrarlle apoio nas negociacións coa familia Gil Varela, e aínda estou agardando pola súa resposta; só tiven a reposta dun deputado delegado, que non me serve de nada. A Besteiro debería preocuparlle ese desprezo ó alcalde dun concello que, se chame como se chame o alcalde, representa ó conxunto de veciñas e veciños do pobo onde apareceu o símbolo do Museo Provincial de Lugo”.