“As trabas do Executivo de Feijóo a este proxecto foron tal, que o bloqueou durante máis de un ano, que foi o tempo que tardou en concedernos a licenza legal e imprescindible para iniciar as súas obras. E todo isto, cando o Goberno de Feijóo fixo que se destruísen 1.300 empregos no sector lácteo dende o 2009, dende que está na Xunta”, remarcou o voceiro.
Martínez adiantou que, aprobado este venres o proxecto, a institución porá en marcha a semana próxima estas actuacións, coas que xera 200 empregos directos e indirectos na provincia. Para elo, recentemente, a Xunta de Goberno acordou as condicións de execución deste proxecto, establecendo que a parte técnico-económica se desenvolve dende a delegación de Tragsa Lugo, non dende Madrid.
Isto suporá, que serán empresas lucenses as que se beneficien das subcontratacións necesarias para a execución destes traballos. Por exemplo, para a construción dun sistema de depuración pioneiro en Galicia ó ser capaz de xestionar o 100% dos residuos ou para a de 16 silos do penso; para importantes tarefas de electricidade; para a adquisición e instalación do equipamento das 13 naves de recría (cubículos, bebedeiros, arrobadeiras, básculas, cornadizas…); ou para a realización de traballos como movementos de terras, cimentacións, pavimentacións, saneamentos ou formigonados.
“O prazo de execución é de 14 meses, polo que o primeiro centro público en España de recría de gando vacún abrirá as súas portas no 2015”, destacou o voceiro.