O alcalde e presidente da Fundación Expomar, José Mª González Barcia, sinalou que “a presenza de Burela na feira celebrada en Cabo Verde hai un mes foi moi positiva, porque servirá para estreitar aínda máis os lazos en materia pesqueira entre o noso porto e ese país. Foi unha primeira experiencia e toma de contacto na que nós quixemos estar presentes, de xeito moi humilde porque os medios económicos son os que son. Xunta de Galicia, Fundación Expomar e sector pesqueiro burelés seguirán traballando neste sentido ao longo dos vindeiros meses”.
O padroado da Fundación Expomar aprobou o plan de actuación para o 2014, que inclúe a celebración de varios eventos de suma importancia para Burela. As XXI Xornadas Técnicas Expomar e o XV Encontro Empresarial de Organizacións Pesqueiras terán lugar os días 22 e 23 de maio e a XIII edición de Produart terá lugar do 8 ao 10 de agosto. González Barcia dixo que “a Fundación Expomar xa está a traballar na organización de estas citas que supoñen un impulso importante para a economía e para a hostalería do noso pobo, ademais de para os sectores implicados directamente en ambos eventos”. Dentro do plan de actuación para o vindeiro ano tamén se inclúe a asistencia a feiras, congresos ou xornadas, o encontro de palilleiras ou a participación na reunión do GAC zona 1 A Mariña-Ortegal.