O proxecto de decreto regulará a primeira venda dos produtos pesqueiros vivos, frescos ou refrixerados, procedentes da pesca e do marisqueo, así como dos produtos procedentes da acuicultura, e dos conxelados e ultraconxelados, sen transformar ou transformados a bordo. Ademais, recollerá os requisitos que deben cumprir os lugares de desembarque ou descarga de todos estes produtos.
Recollerá tamén as obrigas de control da primeira venda, tanto se é en lonxa como se non, así como a expedición de documentos relativos ao desembarque ou descarga e ao transporte dos produtos pesqueiros, establecendo a rastrexabilidade como principio básico da comercialización en orixe. O proceso que teñen que seguir os produtos pesqueiros desde o seu desembarque ou descarga nun porto ou desde a súa introducción no noso territorio ata que se realiza a primeira venda nas lonxas ou centros autorizados, así como a actividade das vendedorías, son outros dos aspectos que regulará este proxecto de decreto.
Vantaxes
O futuro decreto beneficiará os axentes comercializadores, os consumidores e a propia Administración. Así, a través del, os axentes comercializadores aseguran a calidade e posibles certificacións dos produtos. Por outra banda, aos consumidores proporcionaralles confianza respecto da orixe dos produtos pesqueiros e para a Administración suporá unha mellora nos programas de control sobre os produtos pesqueiros e facilitaralle a xestión de incidencias ou alertas de seguridade.
Con este texto, a nosa Comunidade contará cunha norma actualizada e adaptada á regulamentación estatal e comunitaria en materia de control da comercialización dos produtos pesqueiros. Ademais, o novo decreto integrará por primeira vez toda a normativa galega e estatal nesta materia substituíndo as anteriores normas.