Grazas a esta colaboración da Vicepresidencia da Deputación, que é unha nova proba da aposta do organismo provincial pola igualdade de oportunidades para as persoas con capacidades diferentes, fomentarase a integración social, educativa e laboral das persoas con algún tipo de discapacidade intelectual, ao mesmo tempo que se mellorará a súa calidade de vida e a das súas familias.
Neste sentido, Antonio Veiga explicou que “a diferenza do Goberno do Estado e a Xunta de Galiza, que non fan máis que levar a cabo medidas que merman o dereito ao acceso ao Benestar Social, desde a Vicepresidencia da Deputación de Lugo apostamos polo benestar das persoas, máis aínda canso se trata de colectivos en risco de exclusión social, como pode ser o caso do das persoas con capacidades diferentes”.
ASPNAIS é a única asociación que traballa de forma global coas persoas de discapacidade intelectual adulta desenvolvendo transversalmente múltiples tarefas para a integración. O programa de intervención psicolóxica que é obxecto do convenio asinado hoxe, e forma parte dese conxunto de actividades que promove a asociación, facilitará o desenvolvemento dun conxunto de habilidades que mellorarán as interaccións, a nivel persoal, das persoas con discapacidade intelectual, traballando sobre as diferentes dimensións da personalidade para lograr un maior autocoñecemento e aumentar a calidade das interaccións en distintas situacións sociais.
“Mentres que o Partido Popular se escuda na crise económica para converter en negocio a prestación de políticas sociais e, en consecuencia, facer máis profunda a fenda social, desde a área de Benestar Social da Deputación desenvolvemos e apoiamos proxectos que cren na igualdade de dereitos, como este programa de intervención psicolóxica para persoas con capacidades diferentes promovido por ASPNAIS”, concluíu o vicepresidente.