Uns traballos que inclúen a colocación de novas tubaxes, que substituirán a antiga instalación, que presenta na actualidade certas deficiencias en canto a humidades e filtracións de auga. Así, con esta medida, anularase a canalización anterior e activarase a nova co obxectivo de evitar constantes reparacións da instalación vella e atallar o problema de raíz.
En concreto, estase actuando nas canalizacións de fontanería de oito aseos da planta baixa e do primeiro andar, nas que se están instalando tubaxes de aceiro inoxidable, un material que vén a mellorar as antigas canalizacións de cobre que funcionaban no centro ata o de agora.
O Concello leva a cabo as obras despois de que hai unhas semanas o alcalde de Cervo, Alfonso Villares, a edil de Educación, Pilar Armada e técnicos municipais visitasen o colexio para coñecer as zonas de máis urxente actuación e decidir as medidas a adoptar. Unha xuntanza que fora convocada pola ANPA e a directiva do centro e na que se determinou que a instalación de fontanería era unha prioridade.
“Consideramos moi importante apoiar aos centros educativos do municipio, tanto a través de axudas para o fomento de actividades como no mantemento e conservación das instalacións” explica Armada, que hoxe estivo no centro xunto ao rexedor e técnicos municipais comprobando a evolución dos traballos, que previsiblemente rematarán mañá.